SINTAKSIS JAKU IBAN

Nitihka penemu Padang enggau Chemaline (2011), Sintaksis iya nya pampang penemu linguistik ti mansik proses nempa ayat, baka nusun leka jaku dalam ayat enggau kaul leka jaku dalam siti-siti ayat. Sintaksis mega bejuraika use sesebengkah jaku berengkah ari pekara ti pemadu mudah datai ngagai pengerembai ayat nyadi ayat ti kompleks. Iya mega nentuka atur tauka ukum jalai jaku ti bepelasar ba ripih jalai jaku bejantilka leka jaku, nusun leka jaku enggau raban jaku dikena nempa ayat dalam jaku iban.

Tiap-tiap ayat ti ditempa iya nya disebut pasuk tauka konstruk. Sesebengkah pasuk ayat ukai semina berakup tauka bejantilka leka jaku tang iya endang ngembuan atur ti patut dititihka kitai ngambika ayat ti ditempa kitai ulih nyadi ayat ti menyana lalu ngundan reti ti menyana. Atur ti salah ulih ngasuh ayat ti digaga tauka ditempa kitai nya nyadi enda meruan tauka menyana. Ayat nya tadi tau salah ari segi ukum D-N iya nya diterang enggau nerang, jalai jaku enggau salah ari chara kitai nguna iya ti deka nempa sesebengkah ayat. Pasuk ti menyana nekanka atur nusun unit dalam frasa jaku ti dikumbai konstituen. Konstituen iya nya  unit jaku ti nyadi sesebengkah ayat. Chunto iya, subjek enggau predikat.

Subjek enggau predikat amat beguna lebuh kitai deka nempa nama-nama ayat baikka nya ayat penerang, ayat tanya, ayat perintah enggau ayat tekenyit. Subjek enggau predikat mega beguna dikena kitai nentukka bagi tauka bansa ayat sekalika nya ayat aktif tauka ayat pasif.  Tiap-tiap bansa ayat mesti bisi ngundan frasa nama laban frasa nama ulih nyadi subjek dalam ayat lalu mega ulih nyadi predikat dalam ayat. Taja pia proses nempa ayat aktif enggau ayat pasif endang enda sebaka tajapan ayat ditempa kitai ari beberapa iti frasa. Chunto iya, chara kitai nempa ayat iya nya frasa nama+frasa nama, frasa nama+ frasa pengawa tauka kereja, frasa nama+ frasa adjektif enggau frasa nama + frasa jaku penempat. ( FN+FN, FN+FP,FN+FA, FN + Fpt).

Dalam bidang Sintaksis, tukuh tauka tempa ayat aktif enggau ayat pasif disebut gaya ayat. Dalam ayat aktif jaku pengawa nekanka subjek asal nyadi batang pekara tauka batang kenang tang ayat pasif subjek tumbuh ditekanka nyadi batang pekara tauka batang kenang. Taja pia, ba ayat kitai Iban, kitai endang jarang bekenaka ayat pasif lebuh ti nempa ayat. Ayat ti dikumbai ayat pasif iya nya ayat ti nekanka objek asal ti nyadi batang pekara tauka elemen.