MORFOLOFI JAKU IBAN

         Morfologi sesebengah bansa jaku iya nya jalai nempa leka jaku. Morfologi mega pampang penemu linguistik ti mansik struktur, tukuh enggau kelas jaku. Struktur jaku nya tusun tukuh munyi sebut tauka lambang tulis ke nyadi unit ti bisi manggum reti. Tukuh jaku iya nya unit jalai jaku sekalika iya leka jaku tunggal, bepenambah tauka betandu. Lalu pia mega, kelas jaku iya nya proses nentuka bansa leka jaku bepelasarka ba tukuh sereta fungsi iya dalam kelas tauka raban jaku ke sama.

        Morfologi mega beguna bendar dikena meretika penerang senentang konsep morfologi dalam bidang linguistik jaku Iban. Bisi sekeda bansa jaku di dunya tu sebaka jalai nempa leka jaku lalu bisi mega bebida. Bisi sekeda jaku ngena chara meri penambah ngagai urat jaku lalu bisi mega ngena chara ngubah tukuh dalam leka jaku nya empu baka jaku Arab. Morfologi jaku Iban iya nya bidang penemu ti betungkapka struktur, tukuh enggau raban jaku. Iya endang siti bidang kompleks lalu tau dipeda nyadika jematan ti besabungka kaul Sintaksis enggau Fonologi jaku. 

        Morfologi dikumbai bekaul enggau pansik munyi sebut jaku laban iya ngemeranka pansik pasal gaya leka jaku ti datai ari munyi sebut. Iya bekaul enggau pansik Sintaksis laban ari leka jaku iya tau didijir nyadi frasa, klausa enggau ayat ti mai reti. Dalam Morfologi mega, iya bisi nerangka senentang pengawa nempa leka jaku, raban jaku, jaku nama, jaku pengawa, jaku adjektif enggau jaku tugas ke bisi dalam jaku kitai iban.

        Nya alai morfologi tu siti ari pekara ti beguna bendar kelebih agi dikena kitai belajarka jaku dalam jaku iban ngambika jaku kitai tau meruan sereta menyana baka jaku bansa bukai ke udah dulu maju nitihka arus singkang pemansang dunya globalisasyen kemaya hari tu. Berindik ari tu tadi mega, iya ulih mantu jaku kitai ngambika  mudah diperatika lalu mudah dipelajarka orang bansa bukai ke bisi pengerindu tauka pengingin ati ti deka belajarka jaku iban.

1.0   TUKUH LEKA JAKU IBAN

Tukuh leka jaku tau datai ari siti morfem tauka dijir morfem. Proses nempa leka jaku tau ngasilka tukuh jaku baka  leka jaku tunggal, leka jaku tumbuh, leka jaku turu enggau leka jaku betandu. Morfem dalam jaku Iban ulih dibagi ngagai dua bansa iya nya morfem meras enggau berikat. Morfem meras nya morfem ti ulih bediri kediri tang morfem berikat semina ulih bediri enti disukung enggau morfem bukai.

1.1   LEKA JAKU TUNGGAL

Jaku tunggal nya tukuh jaku ti datai ari urat jaku, iya nya nadai udah nerima penambah tauka sukung ari urat jaku ti bukai. Jaku tunggal enti diperatika ari patah sebut tau ngundan siti patah sebut tauka lebih. Siti patah sebut tau dipenyadi ari siti vokal (V) aja tauka siti vokal disempulangka enggau siti konsonan (K) sereta ulih mega disempulangka enggau beberapa iti konsonan. Konsonan tau datai ari mua vokal enggau ari belakang vokal. Konsonan mega tau datai seretai ari mua tauka belakang vokal.

JAKU TUNGGAL SITI PATAH SEBUT

Penyampau jaku tunggal asal ti ngundan siti patah sebut ba jaku Iban enda mayuh. Sekeda leka jaku tunggal nya datai ari jaku injau baka ari jaku Melayu, English enggau jaku bukai.

Jaku Tunggal Siti Patah Sebut	Chunto
VV	au, ai
KV	tu, yu, ju, ru, ti, ni, ke, wa, wi
VK	it, as
KVK	soh, roh, bah, sen, bab
KKVK	stor, skel, draf
KVKK	teks, bank, golf, seks, volt, zink
KKKV	Skru
KKKVK	skrip, straw

JAKU TUNGGAL DUA PATAH SEBUT

Leka jaku dalam jaku Iban tebal agi datai ari leka jaku dua patah sebut. 

Jaku Tunggal Dua Patah Sebut	Chunto
V + VK	aus, aur, ais, auh, aum
V + KV	aku, ubi, isu, ila, iri, ipa, aka, ibu, aya, aki, ini
V + KVK	emas, ubat, ikan, ubah, ulat, akih
VK + KV	undi, unta, unga, ampa, enda
VK + KVK	umpan, untak, empat, ambun, indik, ambuh, ampun
KV + V	dua, tua, sua, dia, bau, rua, kia, bai, tai
KV + VK	paut, kait, pait, baum, baur, buan, daun, gaul, jauh
KV + KV	jala, pasu, buku, garu, buka, rata, leka, kita, kera
KV + KVK	kapal, pukul, bakul, jarum, mulit, kulum, kepil
KVK + KV	sendi, danji, tanju, tampi
KVK + KVK	bintang, sandar, tanduk, sampal, nimbal, lambar, umang
KV + VV	buai, tuai, diau, biau

JAKU TUNGGAL TIGA PATAH SEBUT

Leka jaku tunggal tiga patah sebut enti dibandingka enggau leka jaku tunggal dua patah sebut endang mayuh agi. Pola tusun konsonan – vokal leka jaku ti bansa tu nabur mayuh agi. Enti diperatika leka jaku ti ngundan tiga patah sebut sekeda nya jaku injau ari jaku bansa bukai.

Jaku Tunggal Tiga Patah Sebut	Chunto
KV + KKV + KV	Migrasi
KV + KV + KVK	seriran, lelegup, bedemuh
V + KV + V	Idea
KV + KV + V	semua, menua, pemai
KV + KV + KV	lelaki, lelabi, sebana, bebini, belaki
KV + KV + VK	meruan, seruan, beduan, beduit
KVK + KV + V	mentua, kendua
KVK + KV + VK	tempias, lengkuas, sengkuar
V + KV + KV	utara, ugama, aroma
V + KV + KVK	amatur, amanah
VK + KV + KV	antara, istana, asrama
KVK + KV + KV	menteri, mentega, bestari
V + KV + VK	akaun, elaun
KV + KV + KVK	belelang, senapang, selaput, keretas, keretum
KVK + KV + KVK	sembilan, tempayan,
KV + KVK + KV	belanja, perengka, perambu
KVK + KVK + KV	Semperna
KV + KVK + KVK	belimbing, belangkas, kemundang
KV + KKV + KVK	Mikrofon

JAKU TUNGGAL EMPAT PATAH SEBUT

Jaku Tunggal Empat Patah Sebut	Chunto
KVK + KV + KV + KVK	Sentimeter
V + KV + KVK + KV + KV	University
VK + KV + KV + KV	Emperaja
VK + KV + KV + KVK	engkelulut, emperengut
VK + KKV + KVK + KVK	Encherindak
VK + KV + KV + VK	Engkelait
KVK + KV + KV + KV + KVK	Cosmopolitan
KV + KV + KV + KVK	kapitalis, bekedengung
KV + KV + KV + KVV	bekedugau, bekedayau
KV + KV + KVK + KKV	begerancha
KVK + KVK + KV + KV	Dispensary
KV + KV + V + KVK	Nasional

Akronim mega masuk dalam raban jaku tunggal. Akronim nya jaku kedut ti dipenyadi ari urup pun leka jaku tauka sakum patah sebut ti keterubah ari dijir siti rambai jaku, disebut tauka ditulis nyadi siti leka jaku ti entap, menyana sereta bisi mai reti. Chara tu endang siti ari jalai kena nempa leka jaku ti nyata bisi peluang bekenjing mansang ba jaku Iban. Taja pia, jaku akronim suah ditempa kena nyebut muntang jaku nama menyana tang chara nempa iya nadai chara ti tetap. Reti nya nitihka pengelentur sebut tauka pengentap jalai nulis sida ti ngepunka penemu nya. Jaku akronim tau ditulis ngena tiga chara. 

1.    Sakum urup keterubah ari rambai jaku ti dipandakka lalu ditulis enggau urup besai enti iya nya jaku nama menyana.

Chunto:

SIDS – Serakup Indu Dayak Sarawak

KGA – Komiti Gerija Anglika

YTJ – Yayasan Tun Jugah

SBISA – Sarakup Bansa Iban Sri Aman

2.    Sakum urup keterubah tauka patah sebut, ditulis enggau urup mit semua – mua enti ukai jaku nama menyana.

Chunto:

Palanem – palan latih nembiak

Purata – pukul rata

Pulako – pusat latihan kokurikulum

Kugiran – kumpulan gitar rancak

3.    Enti jaku akronim nyadi ari sakum urup keterubah tauka patah sebut nya nyadi jaku nama menyana, jaku nya ditulis bepun enggau urup besai.

Chunto:

Bernama – Berita National Malaysia

Proton – Perusahaan Otomobil Nasional

Mara – Majlis Amanah Rakyat

1.2   LEKA JAKU TUMBUH

Jaku tumbuh iya nya tukuh jaku ti diasilka ngena proses meri penambah ngagai urat jaku. Proses tu ngasilka tukuh jaku ti disebut jaku tumbuh. Penambah datai ari morfem berikat lalu urat jaku nya morfem meras ti ulih nerima penambah. Penambah nya tukuh morfem ti enda ulih bediri kediri dalam ayat, reti nya iya mesti disakumka enggau urat jaku. Berindik ari endur iya ba urat jaku, penambah tau dibagi ngagai empat bengkah iya nya:

a)    Penambah mua tauka pun, ti datai ari mua urat jaku.

b)    Penambah belakang, ti datai ari belakang urat jaku.

c)    Penambah kepit, ti datai seretai lalu ngepit urat jaku.

d)    Penambah selit, ti datai nyelit antara urat jaku.

JAKU TUMBUH BEPENAMBAH MUA

Penambah mua tau datai dalam jaku nama, jaku pengawa enggau jaku adjektif.

a)    PENAMBAH MUA JAKU NAMA

Penambah Mua Jaku Nama	Chunto
pe	penyepit, penyapu, penulis
pem	Pemberita
penge	pengebom, pengemudi, pengetin
pel	pelajar
se	serumah, semenua,
per	Peranak
juru	juruselam, jurubahasa, juruselamat
pra	prasekula, prasangka, prasejarah
sub	subsistem, subkelas, substandard
eka	ekajaku, ekachura, ekadimensyen
dwi	dwijaku, dwifungsi, dwilambang
supra	supranational, suprakelas, suprasegmental

b)    PENAMBAH MUA JAKU PENGAWA

Penambah Mua Jaku Pengawa	Chunto
me	melandai, menanyi, merindang,
ng	ngibun, ngikat, ngara, nguan
ny	nyekal, nyilat, nyebut, nyikat
nge	ngechat, ngekar,
be	bebantai, bebini, belaki
di	digetil, diambu, didinga, dipejal
dipe	dipejai, dipejurai, dipegendang, diperindang
en	entachang, entanjar, ensayar
em	empekak, empakap, empegal
eng	engkebap, engkasak, engkebut
te	tedani, tepantup, tepalu, tepeda, tedinga, teterap, teduduk, tetemu, tekenang

c)    PENAMBAH MUA JAKU ADJEKTIF

Penambah Mua Jaku Adjektif	Chunto
nge	ngeninggi, ngemesai, ngemaruh, ngemalu, ngemanah, ngemajik, ngenyigat
ke	kekidu, kekesap, kekasak, kekebut
me	memanah, memanis, memasam, memelut
be	bebajik, bebesai, beburak, bebigul
pe	pepanjai, pepandak, pepelu
te	tetegap, tetinggi, tetegar, tedani

JAKU TUMBUH PENAMBAH BELAKANG

Jaku tumbuh penambah belakang dalam jaku Iban semina bisi ba jaku pengawa tumbuh aja. Penambah belakang nya penambah ti ditambahka ari belakang urat jaku tauka leka jaku ti udah dulu nerima penambah mua. Dalam jaku Iban semina siti aja penambah dikena ba ujung leka jaku iya nya penambah ka. 

 

Jaku Tumbuh Penambah Belakang	Chunto
madah	Madahka
mejam	mejamka
madam	madamka
ngesai	ngesaika
ngidup	ngidupka
ngetan	ngetanka
ngemata	ngemataka
nguan	nguanka
ngibun	ngibunka
megai	megaika
merus	meruska

JAKU TUMBUH BEKEPIT

Penambah kepit dalam jaku Iban datai dalam jaku pengawa. Penambah kepit nya penambah ti ditambahka seretai ari mua tauka ari belakang urat jaku.

Penambah Kepit	Chunto
me…ka	melakangka, merindangka, melabaka
ng…ka	ngemaruhka, ngemesaika, ngeninggika, ngemajikka
ny…ka	nyemakaka, nyelingkutka, nyengulaka, nyelamatka
pe…ka	pejeraka, pelapikka, pejuraika
te…ka	tegamaka, tejulukka, tetunjukka, tesebutka, tedingaka
be…ka	bebaika, bedagangka, bebelika, bejualka, bebasaka
di…ka	digalika, dianyutka, dibantaika
dike…ka	dikedekaka,  dikemeranka, dikemulaka
te…ka	tedingaka, tesipakka, teirupka, teempaka
tepe…ka	tepedayaka, teperindangka

JAKU TUMBUH SELIT

Jaku tumbuh ti betukuh selit tu balat mimit ditemu dalam jaku Iban. Tukuh jaku ti baka tu enda tentu produktif lalu semina dikena ba lebas ti ditentuka aja. Jaku tumbuh selit semina bisi ba jaku nama enggau jaku adjektif aja. Penambah selit iya nya penambah ti diselitka ba antara leman pelasar tauka urat jaku.

a)    PENAMBAH SELIT JAKU NAMA

Penambah selit jaku nama	Chunto
le	kelemayang, kelebembang, kelekatai
er	serabut, berigi

b)    PENAMBAH SELIT JAKU ADJEKTIF

Penambah Selit Jaku Adjektif	Chunto
be	teberunsai, teberingkas

1.3   LEKA JAKU TURU

Jaku turu nya tukuh jaku ti nyadi lebuh dua leka urat jaku tauka lebih dirintai sereta didijirka nyadi siti rakup sintaksis ti mai reti ti nyengenda sereta meruan. Proses beturuka jaku dalam jaku Iban endang nyemetak sereta bisi alan ti nyata lalu bebatang. Jaku turu disepil beserara lalu beserakup nyadi siti unit iya nya tukuh ti enda ulih nerima sebarang leman bukai tauka leka jaku bukai ti diselit antara unit nya.

a)    JAKU TURU TI DATAI ARI RAMBAI JAKU MERAS

Dalam kategori tu mega disengkaumka enggau tukuh jaku ti dikena meri tanda tauka pangkat, gelar sereta ensumbar.

CHUNTO

kar perugan	kereban tulis
charta pie	bandar raya
ü jalai alun	papan notis
kepala menteri	menteri besai

b)    JAKU TURU TI BETUKUH TERMINOLOGI

CHUNTO

model linear	reta pesaka
segi tiga	keretas kereja
atur chara	mija segala

c)    JAKU TURU TI MAI RETI SEMPAMA BISI TIGA BENGKAH

1.    Jaku turu kelaung.

2.    Jaku turu silup.

3.    Jaku turu sema banding.

JAKU TURU KELAUNG

CHUNTO

buah lemba	anak ular
betubuh bisi	buah tamang raja

JAKU TURU SILUP

CHUNTO

nyual mata	rangkai jaku
bisi ati	tajam runding

JAKU TURU SEMA BANDING

CHUNTO

baka ukui labuh anak	baka mayau enggau ukui
asai pansut ari nyawa baka	munyi burung makai buah kara

d)    JAKU TURU BANDING

CHUNTO

baka nya	baka nyin
baka tu	baka ni

TUKUH JAKU TURU TI UDAH ENTAP

CHUNTO

antarabansa	Bumiputera
matahari	Biaubalai

BETANDUKA JAKU TURU

Betanduka jaku turu tau diaduka ngena chara betanduka leman keterubah jaku aja.

CHUNTO

kereban-kereban tulis	kepala-kepala pengajar
balai-balai raya	sapit-sapit menteri

MERI PENAMBAH NGAGAI JAKU TURU

Jaku turu tau nerima penambah kena ngasilka jaku tumbuh.

a)    Lebuh jaku turu nerima penambah mua lalu sepil jaku nya beserara.

CHUNTO

darah gatal	bedarah gatal
betelefon binching	betelefon binching
nyual mata	bejual mata

b)    Lebuh jaku turu nerima penambah mua, leka jaku keterubah ti udah nerima penambah diulang sebut. Pia mega leka jaku ti udah nerima penambah nya diseraraka ngena tanda sekang ari leka jaku ti kedua.

CHUNTO

tengah hari	setengah-tengah hari
lemai kemari	selemai-lemai kemari
pagi tadi	sepagi-pagi tadi
malam tadi	semalam-malam tadi

c)    Lebuh leka jaku ti keterubah diulang sebut, iya diseraraka ngena tanda sekang.

CHUNTO

bisi ati	bisi-bisi ati
rangkai jaku	rangkai-rangkai jaku
tajam runding	tajam-tajam runding

d)    Lebuh jaku turu keterubah nerima penambah bekepit, sepil iya meruan beserara.

CHUNTO

nyual mata	bejualka mata
mipis pending	ngemipiska pending
besai ati	ngemesaika ati
manis mulut	ngemaniska mulut

1.4   LEKA JAKU BETANDU

Proses betanduka leka jaku dalam jaku Iban nya proses ti betanduka urat leka jaku. Dalam proses tu urat leka jaku tau betandu penuh, betandu setengah tauka betandu sebagi ba patah sevut dulu tauka dudi enggau betandu urat leka jaku lalu sekeda besukung enggau penambah tauka nadai bepenambah.

a)    Jaku betandu patah sebut dulu.

b)    Jaku betandu penuh.

c)    Jaku betandu urat jaku.

d)    Jaku betandu patah sebut dudi.

JAKU BETANDU PATAH SEBUT DULU

Jaku betandu patah sebut dulu nya tukuh ti betandu ba patah sebut dulunkelebih agi ba tukuh jaku adjektif.

CHUNTO

besai-besai	Bebesai
dugau-dugau	Dedugau
liga-liga	Leliga
pelu-pelu	Pepelu

JAKU BETANDU PENUH

Jaku betandu penuh nya tukuh leka jaku ti dikena beulang-ulang. Sepil leka jaku ti dikena betandu nya sebaka. Kelas jaku ti dikena betandu nya tau datai ari jaku pengawa, jaku nama rama, jaku adjektif tauka jaku tugas.

CHUNTO

bagas	bagas-bagas
degi	degi-degi
puas	puas-puas
gama	gama-gama

JAKU BETANDU URAT JAKU

Jaku betandu urat jaku nya tukuh leka jaku ti betandu ba urat leka jaku. Bisi dua pola jaku betandu urat leka jaku.

a)    Pola jaku betandu urat jaku betukuh jaku pengawa

CHUNTO

sipak	besipak-sipak
garu	begaru-garu
jimat	bejimat-jimat
lubah	belubah-lubah

 b)    Pola jaku betandu urat jaku betukuh jaku adjektif

CHUNTO

manah	manah-semanah
siru	Siru-sesiru
nelap	nelap-senelap
mangah	mangah-semangah
mar	mar-semar

JAKU BETANDU PATAH SEBUT DUDI

Jaku betandu patah sebut dudi nya tukuh jaku ti betandu ba patah sebut dudi leka jaku lalu tebal agi betukuh jaku adjektif.

CHUNTO

berani	berani-rani
pengeran	pengeran-ngeran
pemerinsa	pemerinsa-rinsa
pemanah	pemanah-manah
pemalu	pemalu-malu
pemula	pemula-mula
belanda	belanda-landa

2.0   KELAS LEKA JAKU

Kelas jaku tauka raban jaku dalam jaku iban ulih dibagi ngagai empat bengkah iya nya baka kelas tauka raban jaku nama, jaku pengawa, jaku adjektif enggau jaku tugas. Kelas jaku tu ngembuan penteba sereta bida enggau pangan diri. Kelas jaku ti bansa tu beguna bendar dikena kitai nentukka bansa jaku nya sekalika nya jaku nama, jaku pengawa, jaku adjektif tauka jaku tugas.

Leka jaku dalam siti-siti bansa jaku tau dibagi ngagai raban jaku tauka kelas jaku ti bebatang nitihka mayuh bengkah kriteria. Status leka jaku ti betukuh meras ulih ditentuka ari ti beratika pasuk jalai jaku ti nunjukka bagi frasa, klausa enggau ayat. Disebut enggau gelih bukai, leka jaku tau didijir nyadi ayat berindik ari tusun frasa enggau klausa. Ayat enggau klausa ngundan dua batang konstituen iya nya frasa subjek enggau frasa predikat. Frasa subjek tau ditempa ari empat bengkah frasa iya nya frasa nama (FN), frasa pengawa (FP), frasa adjektif (FA) enggau frasa jaku penempat (FJP). Semua frasa tu disebut batang frasa. 

3.1 KELAS JAKU NAMA

Jaku nama seraban leka jaku ti tau  nyadi leman teras ngagai pasuk frasa nama lalu jaku ti bansa tu endang dikena meri ngagai nama orang, tempat, bansa utai tauka konsep. Raban jaku nama ulih dibagi ngagai tiga bengkah iya nya jaku ganti nama, jaku nama rama enggau jaku nama menyana. 

JAKU NAMA MENYANA

Jaku nama menyana nya jaku nama ti nanggam reti ti mantang ba nama orang, jelu, nama utai, geremoung (institusyen) bansa, jaku, pangkat enggau ti bukai. Dalam betulis, urup keterubah jaku nama menyana ditulis enggau urup besai. Jaku nama menyana ulih dibagi ngagai dua iya nya jaku nama menyana idup enggau jaku nama menyana ukai idup. Jaku nama menyana idup dibagi ngagai dua bengkah iya nya jaku nama menyana idup mensia enggau jaku nama menyana idup ukai mensia.

JAKU NAMA MENYANA IDUP MENSIA

Jaku nama menyana idup mensia tau digembar enggau gelar, pangkat, ensumbar enggau buah ayat.

CHUNTO

Jackson Dampul	Prof. Masam Langi
Doktor Pangkas	Raja Durong

JAKU NAMA MENYANA IDUP UKAI MENSIA

Jaku nama menyana idup ukai mensia nya jaku nama ti nunjuk ngagai utai idup tang ukai mensia, baka petara dalam pengarap lama Iban, jelu, utai tumbuh engggau mayuh agi ti bukai.

CHUNTO

Sempulang Gana (petara)	Kelapung (ukui)
Ananas Comosus (nanas)	Tapah (ikan)

JAKU NAMA MENYANA UKAI IDUP

Jaku nama menyana ukai idup nunjuk ngagai nama utai ti nyengenda tang ukai nama utai idup baka nama institusyen, menua, tempat, bansa, jaku, pangkat enggau ti bukai.

CHUNTO

Iban	Honda
Malaysia	Wisma Pelita

JAKU NAMA RAMA

Jaku nama rama ulih dibagi ngagai dua iya nya jaku nama rama idup enggua jaku nama rama ukai idup. Jaku nama rama idup dibagi ngagai dua iya nya jaku nama rama idup mensia enggau jaku nama rama idup ukai mensia. Jaku nama rama idup ukai mensia mega dibagi ngagai dua iya nya jaku nama rama ukai idup ukai institusyen enggau jaku nama rama ukai idup institusyen.

JAKU NAMA RAMA IDUP MENSIA

Jaku nama ti bansa tu nunjuk ngagai mensia.

CHUNTO

Pengajar	Indai
Manang	Aya

JAKU NAMA RAMA IDUP UKAI MENSIA

Jaku nama ti bansa tu nunjuk ngagai nama utai idup ukai mensia ti nanggam reti rama.

CHUNTO

Engkuli	Ingkat
Belut	Antu

JAKU NAMA RAMA UKAI IDUP INSTITUSYEN

Jaku nama bansa tu nunjuk ngagai institusyen ti betukuh ukai idup tang manggum reti rama.

CHUNTO

Sekula	Sepital
Universiti	kolej

JAKU NAMA RAMA IDUP UKAI INSTITUSYEN

CHUNTO

rumah	pasar
sungai	jalai

JAKU GANTI NAMA

Jaku ganti nama dikena nganti jaku nama menyana enggau jaku nama rama. Jaku ganti nama tau dibagi ngagai dua iya nya jaku ganti nama tunjuk enggau jaku ganti nama diri. Jaku ganti nama diri bisi dua bengkah iya nya jaku ganti nama diri Tanya enggau jaku ganti nama diri orang. Jaku ganti nama diri orang bisi empat iya nya jaku ganti nama diri orang kesatu, kedua, ketiga enggau beempu.

JAKU GANTI NAMA TUNJUK

Jaku ganti nama tunjuk semina bisi tiga bengkah dalam jaku iban.

CHUNTO

Tu	kena nunjuk ngagai utai ti datai tegu tauka pekara ti benung disebut.
Nya	kena nunjuk ngagai utai ti semak tang enda ulih ditegu.
Nyin	kena nunjuk ngagai utai ti jauh tauka pekara ti nyata bendar seraka.

JAKU GANTI NAMA DIRI

JAKU GANTI NAMA DIRI TANYA

Jaku ganti nama diri Tanya nunjuk ngagai nama utai, konsep tauka orang ngena jaku Tanya. Jaku ganti nama diri tanya tau ngena proses betandu kena ngangkatka reti ti nunjuk ngagai sesebengkah pekara.

CHUNTO

Nama	nunjuk ngagai nama utai, pekara tauka konsep.
Sapa	nunjuk ngagai bagi orang.
Ni	nunjuk ngagai bagi orang, nama utai enggau konsep.

JAKU GANTI NAMA DIRI ORANG

Jaku ganti nama bansa tu ngundan leka jaku ti nunjuk ngagai siku-siku orang.

CHUNTO

Jaku ganti nama diri orang kesatu	aku, kami, kitai
Jaku ganti nama diri orang kedua	nuan, seduai, kita
Jaku ganti nama diri orang ketiga	iya, sida
Jaku ganti nama diri orang beempu	engku, engkami, engkita, engkitai

3.2 KELAS JAKU PENGAWA

Jaku pengawa nya leka jaku ti nyadi teras ngagai pasuk tauka konstruk frasa pengawa. Frasa pengawa datai ari datai ari jaku pengawati tau disempulang mayuh leman jaku baka jaku bantu, objek, penembu, ayat komplemen enggau penerang. Raban tauka kelas jaku pengawa ulih dibagi ngagai dua iya nya jaku pengawa transitif enggau jaku pengawa ukai transitif (intransitif). Jaku pengawa transitif tau dibagi ngagai dua iya nya jaku pengawa transitif aktif enggau jaku pengawa transitif pasif. Jaku pengawa ukai transitif mega ulih dibagi ngagai dua iya nya jaku pengawa ukai transitif bepenembu engggau jaku pengawa ukai transitif nadai bepenembu.

a)    JAKU PENGAWA UKAI TRANSITIF

Jaku pengawa ukai transitif nya jaku pengawa ti nadai begunaka penyambut tauka objek entudika iya. Taja pia bisi sekeda jaku pengawa ukai transitif mesti dientudika penembu tang sekeda agi enda begunaka penembu. 

JAKU PENGAWA UKAI TRANSITIF NADAI BEPENEMBU

Jaku pengawa ukai transitif nadai bepenembu nya jaku pengawa ti ulih berdiri kediri lalu nadai disukung objek tauka penyambut.

CHUNTO

Pulai	Semua orang pulai.
Tinduk	Adi aku benung tinduk.
Tuchum	Nembiak nya tuchum.
Berandau	Seduai iya benung berandau.

JAKU PENGAWA UKAI TRANSITIF BEPENEMBU

Jaku pengawa ukai transitif bepenembu nya jaku pengawa ti mesti dientudika penembu kena ngayanka reti ayat nya enggau nyemetak. Leman penembu nya enda tau enda dikelala sibil sekalika objek tauka penyambut. Dua pekara tu endang bebida. Objek tauka penyambut semia datai udah jaku pengawa transitif lalu tau mega nerima proses pasif. Penembu nya leman ti datai entudika jaku pengawa ukai transitif dikena ngayanka reti ayat nya enggau nyemetak. Ayat ti ngundan penembu enda ulih dipasifka.

CHUNTO

Belinsur	Apai iya ti sakit nyau belinsur gerai.
Ngereja	Seduai iya nadai ngereja peengawa jai.
Diau	Sida sebilik diau di Rumah Jawan.

b)    JAKU PENGAWA TRANSITIF

Jaku pengawa transitif nya jaku pengawa ti ngundan objek ti datai ari frasa nama dikena ngelempai tauka mantangka reti.

JAKU PENGAWA TRANSITIF AKTIF

Jaku pengawa transitif aktif jaku pengawa ti nerima penambah mua penganti pun m-, n-, penambah kepit nge…ka, be…ka enggau penambah mu any-, ng-, enggau meN-.

CHUNTO

Macha	Bala nembiak nya benung macha bup.
Malas	Aku udah malas surat nya.
Nyimpan	Iya nyimpan surat nya ngagai karung surat.

  Chunto penambah mua te- tau datai dalam jaku pengawa transitif aktif.

teirupka	Indu nya teirupka rachun rumput.
teindikka	Aku teindikka paku lawing betegar.
tetelanka	Iya tetelanka leka maram.

JAKU PENGAWA TRANSITIF PASIF

Jaku pengawa transitif pasif nya jaku pengawa asil ari proses tranformasyen tauka ubah ayat aktif ti nyadi pasif. 

CHUNTO

Bup benung dibacha bala nembiak nya.

Surat nya udah dibalas aku.

Surat nya disimpan iya ngagai karung surat.

CHUNTO JAKU PENGAWA TRANSITIF AKTIF ENGGAU PASIF

aktif	pasif
ngatur	diatur
melah	dibelah
ngukum	diukum
nempuh	ditempuh
nyait	dijait
mengeksport	dieksport
muai	dibuai
nyaga	dijaga

3.3 KELAS LEKA JAKU ADJEKTIF

Jaku adjektif nya datai ari leka jaku ti nyadi leman teras dalam konstruk frasa adjektif. Frasa adjektif tau datai ari seleka jaku adjektif enggau leman penerang ti bukai baka jaku bantu tauka jaku penguat. Jaku adjektif mega ulih dikelala tauka dibida ari jaku nama tauka jaku pengawa ari ti beratika chara iya ditempa.

RABAN JAKU ADJEKTIF DALAM JAKU IBAN

I)             Jaku adjektif gaya

II)            Jaku adjektif chura

III)           Jaku adjektif sukat

IV)          Jaku adjektif tukuh

V)           Jaku adjektif maya

VI)          Jaku adjektif seraka

VII)         Jaku adjektif emosyen tauka geregayak ati

VIII)       Jaku adjektif chara

IX)          Jaku adjektif rawang

Jaku adjektif	Chunto
Jaku adjektif gaya	manah, jai, regas, pandai, lembut, kasar, berani, takut, manchal, sakit, tegap.
Jaku adjektif chura	burak, chelum, mirah, banda, gadung, biru, kuning, kelabu, pirang, kalas.
Jaku adjektif sukat	panjai, pandak, mit, mipis, tebal, mabu, dalam, langkang, surut, renjan, landau.
Jaku adjektif tukuh	segala, benjung, chapir, gendung, jungkang, jebung, lusing.
Jaku adjektif maya	tumu, laun, diatu, legi, ila, pagila.
Jaku adjektif seraka	jauh, semak, besendi, besenentang, bejenguk, sepenikau, sepenenggau.
Jaku adjektif emosyen tauka geregayak ati	beraie, gidan, begedi, sayau, rindu, sinu, rawan, asa, lelengau, irau, malu.
Jaku adjektif chara	sikar, beguai, begadai, lubah, berumban, bejimat, tegar.
Jaku adjektif rawang	a)    Rawang asai: nyamai, manis, masam, masin, kelat, tabar, bias, bal, pedas. b)    Rawang peda: bajik, sigat, jai, memelan, pegari, ringgas. c)    Rawang dinga: ragak, taing-taing, inggar, richah, raguk, nyaris, sunyi. d)    Rawang bau: rengut, but, sinang, lesin, bari, ngaba. e)    Rawang tegu: alus, lichin, engkinjur, kasar, kering, begeru.

3.4 KELAS LEKA JAKU TUGAS

Jaku tugas ti datai dalam ayat ukai bekenjing nyadi leman teras dalam predikat sekalika frasa nama, predikat frasa pengawa tauka predikat frasa adjektif. Jaku tugas nya leka jaku ti datai dalam ayat, klausa tauka frasa kena nanggam sesebengkah tugas sintaksis sekalika nyadi jaku penyambung, penerang, penentu, penguat, jaku pun ayat enggau tugas-tugas bukai. 

 

Raban jaku tugas	Chunto
Jaku penyambung	Penyambung tunggal: enggau, lalu, tauka, tang, sereta, sambil, udah, nyerumba. Penyambung selit relatif: ti, ke. Penyambung selit kompleman: nya. Penyambung selit penerang: laban, arapka, ngambika, ketegal, enti sema, awakka, kena, maya, seraya.
Jaku tekenyit	Apu, akaidai, chis, ah dih, pui, nya, uh, wah, au, akai, oh, nya mih, naka iya, bah.
Jaku tanya	Berapa, kemaya, baka ni, nama, dini,
Jaku perintah	Anang, uji, lalu, tulung, arapka, awakka, minta, tulung mih, anang mih, peda.
Jaku pun ayat	Nyadi, kenu ku, berindik ari nya, nama agi deh, bisi sekali, keterubah tu, kebuah pia, ari nya.
Jaku bantu	udah, deka, kala, benung, bedau, empai, patut, mesti.
Jaku penguat	amat, pemadu, kurang, kelalu, pengabis,amai.
Jaku penentu tauka partikel	mih, pia, dih, tak.
Jaku sangkal	ukai, nadai, enda, anang.
Jaku penunjuk	nya, nya iya.
Jaku penempat	di, ke, ari, dalam, ngagai, nuju, ba.
Jaku pemendar	ya, betul, amat, bendar.
Jaku penyampau	tiga, semua, beribu-ribu.
Jaku adap	atas, baruh, dalam.

 4.0  SIMPUL PENEMU

        Morfologi sesebengkah bansa jaku nya jalai nempa leka jaku. Bisi sekeda jaku ngena chara meri penambah ngagai urat jaku lalu bisi mega ngena chara ngubah tukuh dalam leka jaku. Jaku Iban ngembuan tukuh jaku baka tukuh leka jaku tunggal, tukuh leka jaku tumbuh, tukuh leka jaku turu enggau tukuh leka jaku betandu. Keempat-empat tukuh jaku  tu amat beguna dalam jaku Iban dikena ngasilka jaku Iban ti standard ngambika setanding tauka setipak enggau jaku bukai ti benung nyingkang maju dalam arus globalisasyen kemaya hari tu. Jaku Iban mega bisi ngembuan kelas jaku tauka raban jaku kediri empu baka kelas leka jaku nama, kelas leka jaku pengawa, kelas leka jaku adjektif enggau kelas leka jaku tugas. Kelas leka jaku beguna dikena kitai nentuka bansa tauka bagi sesebengkah leka jaku nya. Pekara ti bansa tu ulih mantu pengentap jaku Iban ti deka dijadika sebansa jaku intelektual kemaya hari tu.

     Ba tukuh leka jaku Iban baka tukuh leka jaku tunggal dia kitai ulih nemu jaku tunggal bisi empat bengkah iya nya jaku tunggal siti patah sebut, jaku tunggal dua patah sebut, jaku tunggal tiga patah sebut enggau jaku tunggal empat patah  sebut. Simpul ngena jaku pandak, tukuh jaku enggau kelas jaku endang amat beguna dalam sesebengkah jaku. Kedua-dua pekara tu ngembuan tanggung pengawa ti besai dikena kitai ngelala bansa jaku enggau bansa ayat. Berindik ari nya dia kitai tau ulih magi ayat tauka jaku nya ngagai bagi ti betul tauka seriran enggau guna sereta fungsi iya dalam ayat lebuh kitai ti belajarka jaku iban.